الحرشه معمره بالدجاج

السلام عليكم ورحمة الله وبركاتة


اليوم غنحط ليكم الحرشة معمرة بالدجاج

http://forum.hawahome.com/nupload/101285_1251888907.jpg



طبعا ممكن تعمروها بللي بغيتو

هيا نفس عجينة الحرشة
لكن كنضيفو ليها شوية ديال الدقيق الحرش (سبيسيال)
باش كتجي سهلة فالتعمار بلى متقطع لينا




و صدقوني كتجي لذييييذة و ممكن ترفقيها بسلطة او غيرها

و تكون وجبة رئيسية
كيف عملت انا قدمتها فالعشاء مع سلطة مشكلة خفيفة
و طبسيل الروز معمر بالربيع
مرفق بصوص الصوجا و العسل




و نتمنا تعجبكم



http://forum.hawahome.com/nupload/101285_1251888884.jpg

مقادير

http://forum.hawahome.com/nupload/101285_1251888850.jpg


مقادير الحرشة :




500 g غرام سميدة الحرشة

100 g غرام دقيق حرش سبيسيال
ملعقة صغيرة ملح، ملعقة كبيرة سكر
رأس ملعقة خميرة الخبز، فاني
خميرة حلوى ،فنجان حليب بودرة
فنجان زيت
لتر ماء 1/4 (ممكن إضافة الماء اكثر حسب جودة الدقيق المستعمل)





مقادير الحشوة :





دجاج ( اي جزء متوفر عندكم)

نصف مكعب البنة كنور زعفران
ملعقة صغيرة ملح
ملعقة صغيرة مروزية
قبصة إبزار ، كامون
ضرس ثوم محكوك
بصلة مشلضة
ملعقة كبيرة زيت
ربيع






الطريقة :






طريقة الحرشة :
http://forum.hawahome.com/nupload/101285_1251890873.gif




في إناء نخلطو المقادير الناشفة بالتتابع

كيف مبين فالصور
500 غرام سميدة الحرشة
+ 100 غرام دقيق حرش سبيسيال
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ فاني
+فنجان حليب




نخلطو كلشي النواشف مزايان و نضيفو الزيت و نفتلوها

كيف تانفتلو الكسكس او البات بريزي حتا تشرب الزيت




ثم نضيفو4/1 لتر ماء ونعجنو السميد

حتا نحصلو على خليط رخو
و متماسك فنفس الوقت
(ممكن إضافة الماء اكثر حسب جودة الدقيق المستعمل)






و نخليوها ترتاح و تخمر شوية او تطلق





طريقة الحشوة :
http://forum.hawahome.com/nupload/101285_1251890934.gif



انا استعملت بقايا دجاج سدر و فخيضات

نتفت منهم اللحم (كيف تنعملو فالبسطيلة)
و شحرت البصلة و الثوم
و صفت ليها العطرية :
نصف مكعب البنة كنور زعفران
+ملعقة صغيرة ملح
+ملعقة صغيرة مروزية
+قبصة إبزار ، كامون




و الدجاج و الربيع و 3 معالق كبيرة ماء

و خليتو يتشرب مزيان





لكن لو كان الدجاج طري يعني مطايبش

كنخلطو العطرية :
(نصف مكعب البنة كنور زعفران
+ملعقة صغيرة ملح
+ملعقة صغيرة مروزية
+قبصة إبزار ، كامون)
و البصل و الثوم و نصف كمية الربيع
و نرقدو فيها قطع الدجاج (سدر او فخض ...)
منقية و مغسولة و نخليوها تتشرب شوية الخلطة




و نديروها عادي فالكوكوت طيب مزيان

و بعد النضج
ناخذو الدجاج نتفوه و نقيوه من الجلد و العضام
و نضيفو ليه الباقي من الربيع
و نخليوه يتشحر حتى ينشف من المرق




و نخليو الحشوة على جنب تبرد

كيف مبين فالصور







طريقة الحشو او التعمار :


http://forum.hawahome.com/nupload/101285_1251891941.gif


السطح للي غنخدمو عليه كنرشوه بالسميد الحرش ديال الحرشة




كناخذو الكرة نبسطوها او نكرصوها

و نحطو وسطها ملعقة من الحشوة
و نبداو نجمعو الجنبات
و نطبقوها و نكرصوها غير شوية باش تلصق
و نمرمدوها على 2 جهات فالسميد الحرش ديال الحرشة
و نستمرو فهاد العملية حتى نكملو كل الكرات






و بعد منكملو التعمار

نسخنو المقلة (مقلة وجدة افضل)


http://forum.hawahome.com/nupload/101285_1251892426.gif


و نبداو نطيبو الحريشات ديالنا

على نار مهيلة
حتى يتحمرو و يطيبو على خاطرهم


التقديم :

http://forum.hawahome.com/nupload/101285_1251892432.gif

منقوووله،،،لكن انا جربتها،بالفعل تتزدق

تبارك الله عليك أم إيلاف باين عليك حادقة

شهيتينا في شهيوات الحلوة

في إنتظار المزيد

وفيك بارك الله بنت المغرب،فينيا هاد الحداكه،راه مزال كنتعلم،
راه واحد الأخت هي لي كانت السبب في هاد الحرشه،حتى جربتها عاد فكرت حتى أنا نحطها ليكم هنا
صافي مرحبا بيك عندي ونعملها ليك :oops: